Siulersuisut

Siulersuisuni Siulittaasoq

Emma Lennert

𝗘𝗺𝗺𝗮 𝗸𝗶𝗻𝗮𝗮𝘃𝗮?

Emma Lennert 25-inik ukiulik sisimiormiuuvoq, ulluinnarnilu meeqqat atuarfiani ilinniartitsisuulluni.

Emma Sorlammi ukiut tallimat sulinikuuvoq, 2016-imi siulersuisunut ilaasortanngorpoq, maannalu siulittaasutut qinigaaqqammerpoq.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

“Pingaarnertut Sorlaap ingerlanera toqqisisimasumik peqqissaartumillu ingerlanissaa angorusuppara,

kiisalu Sorlaap ukiuni marlunni tulliuttuni anguniagassai anguneqarnissaat. Anguniakkat Sorlammi suleqatikkalu suleqatigiilluta angujumaarigut qularinngilara” Emma oqarpoq.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Emmap Sorlaap aaqqissuussanut meeqqat inuusuttullu peqataasarnissaat kaammattuutigaa.

“Sorlammut peqataalluni inuttut ineriartornartorujussuuvoq, pikkorissarnermi nutaamik ilisimasaqalerneq, nutaanik kammattaartorneq, ataatsimoornerlu nuannersumik misigalugit taakkua puigunaatsorujussuusarput😁

Aamma qujamasuttarnissaq qaamasumillu isiginnittaaseqarnissaq peqqinnartutut isigivara💫

Nittartakkartigut akerartuunnerit pinngikkaluarlugit eqqaamasassagipput aamma nersualaarinnissinnaagatta” Emma oqarpoq

Siulittaasup tullia

Qulutannguaq Berthelsen

𝗤𝘂𝗹𝘂𝘁𝗮𝗻𝗻𝗴𝘂𝗮𝗾 𝗸𝗶𝗻𝗮𝗮𝘃𝗮?

Qulutannguaq Berthelsen 37-nik ukiulik Aasiammiuuvoq, 2005-milu nuummiunngornikoq. Ulluinnarnilu sanaartorfimmi kuitsivilerisoq “betonmand” ukiuni 15-nini suliffigalugu.

Qulutannguaq Sorlammi siulersuisunut ilaasortanngoqqaarpoq ukioq 2012 naalersoq.

Qulutannguaq 2016-2021 Sorlammi siulittaasuuvoq, mannalu siulittaasup tulliatut inissisimalluni.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

“Pingaartitaraara sorlammi ilaasortat suleqatinginissai ilaasortallu kissaatai malillugit suliniutinik piviusunngortitsinissaq angorusullugu, minnerunngittumik sorlammi siulersuisut suleqatigilluarnissai ataatsimut suleqatigiinneq angusaqarfiulluartarmat.

Peqqinnartuuvoq meeqqat inuusuttullu akornanni ataatsimooqatigiittarneq nukinnik nutaanik pilersitsisuusarmat, Sorlak aqqutissiuisuuvoq suliniutinik assingiinngittunik” Qulutannguaq oqarpoq.

Qulutannguaq isumaqarpoq meeqqat inuusuttullu oqariartuutai pimoorullugit tusarnaangassaasut. Meeqqat inuusuttullu eqqarsariallaqqittuuneri, isummerluttaqqittuuneri, oqariatullaqqittuunerilu atorluartariaqarigut.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Qulutannguup Sorlaap højskolertitsisarneranut meeqqat inuusuttullu peqataasarnissaat kaammattuutigaa. Aammalu ilaqutariinneq toqqissisimasoq angerlarsimaffillu toqqissisimasuunissaat kissaatigaa, meeqqat inuusuttullu pillugit.

“ Meeqqat inuusuttullu atungaat assingiinngisitaartuupput, taamaattumik Sorlammi højskolertitsisarnerput iluaqutaasaqaaq, inuttut ineriartornermut tunngasunik sakkussaanik immersorneqarluartarput tamannalu iluaqutingineqarluartarpoq, taamattumik inuusuttut atorluaanissai kissaatingaara.

Kaammattuutingerusuppara ataatsimoorluta nukimmik nutaamik pilersitsisa. Ilaqutariinneq toqqissisimasoq angerlarsimaffillu toqqissisimasut meeqqat inuusuttullu pillugit suliniuteqartuarta! “

Qulutannguaq oqarpoq.

Ulluinnarni Aqutsisoq

Aputsiaq Petersen

𝗔𝗽𝘂𝘁𝘀𝗶𝗮𝗾 𝗸𝗶𝗻𝗮𝗮𝘃𝗮?

Aputsiaq Petersen 24-nik ukiulik nuummiuuvoq ulluinnarnilu Matu Security-mi sulisuulluni.

Aputsiaq 2016-miilli ataasiaannaanngitsoq Sorlammi peqataasareerluni suleqataasareerlunilu aasaq maanna siulersuisunut ilaasortanngorpoq.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

“Pingaarnerpaatut siulersuisuni ilaasortaaqatikka minnerunngitsumillu sorlammut ilaasortat suleqatigilluarnissai pingaartippakka. Aammattaaq ilaasortat kissaatai tusarnaarnissai pingaartitaralugit” Aputsiaq oqarpoq.

Aputsiaq isumaqarpoq meeqqat inuusuttullu sammisassaqartitsivii qaammarsaafigineqartariaqartut.

“Sorlammi siulersuisunut ilaasortatut anguniagarivara meeqqat inuusuttullu sammisassaqartitsivii qaammarsassallugit. Nalunngilarput ulluinnarni meeqqat inuusuttunullu sammisassaqartitsiviit suli qaammarsarnerusinnaagigut tamannalu suliniutigissavarput meeqqat inuusuttullu ulluinnarni susassaqartitsiviit suleqatigalugit ” Aputsiaq erseqqissaavoq.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Aputsiaq meeqqanut inuusuttullu tunuarsimaartannginnissaanik kinaassusertillu atorlugu sassartarnissaanik kaammattuivoq.

“Sorlammi peqataalluni pissarsianik arlalinnik ilinniutaasinnaasunik aallerfiulluartarpoq, inuttut ineriartornartuuvoq, nutaanik kammattaartorneq, ilikkagaqarsimallunilu tunniusserusunnermik pilersitsisarluni.

Eqqaamaannassavat illit illiuvutit sapinngikkuma aamma illit sapinnginnavit aammattaarlu eqqaamassavat inuuneq qalipaatilersugaq nuannersuuvoq” Aputsiaq oqarpoq.

Siulersuisunut Ilaasortaq

Karen Olsen-Lyberth

𝗞𝗮𝗿𝗲𝗻 𝗸𝗶𝗻𝗮𝗮𝘃𝗮?

Karen Olsen-Lyberth 24-inik ukiulik Sisimiormiuuvoq. Karen takornarissanik angallassisartutut ilinniarsimasuuvoq, nunarsuarmi angalanermik nuannarisalik, ulluinnarnilu meeqqat angerlarsimaffiani suliffeqarluni.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

“Sorlammi pingaarnertut sulissutigerusuppara, nunani issittuni avannarlernilu attaveqatigiinnerup nukittorsarnissaa, anguniagaqartilluni suleqatigiinnerup suliaq oqilisittarmagu.” Karen oqarpoq.

Karen isumaqarpoq Sorlak avammut ersarinnerulertariaqartoq.

“Sorlaap avammut nittarsaannerulernissaa pingaaruteqarpoq, taamaaliornikkut meeqqat inuusuttullu ilisimaarinerulerniassammassuk qanimut suleqatigaluta pissutsinik allanngueqataasinnaallutik.” Karen erseqqissaavoq.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Karenip kaammattuutigaa tunuarsimaarani nuannarisanik pikkoriffinnillu ujartuilluni misileraajuartarnissaq.

“Sorlaap pikkorissartitsisarneranut allanilu periarfissaqartilluni sakkussanik aallerfiusinnaasuni tunuarsimaarani peqataasarnissaq kaammattuutigerusuppara, inuuneq tamaat ilinniarfiummat.” Karen oqarpoq.

Karenip nunanut allanut paasisassarsiorluni angalasarnissaq innersuutigaa🌍✈️

Pisinnaasorisat qaangerlugit misigisassarsiorneq nukittuunngortitsisarmat.

“Inuunermi nuannersunik ujartuiuaritsi, eqqaamallugulu sinnattusi angorusutasilu piumagussi nammineerlusi piviusunngortissinnaagassigit.” Karen oqarpoq.

Siulersuisunut Ilaasortaq

Petra Olsvig Inûsugtok

𝗣𝗲𝘁𝗿𝗮 𝗸𝗶𝗻𝗮𝗮𝘃𝗮?

Petra Olsvig Inûsugtok 22-nik ukioqarpoq Sisimiormiuuvoq. Petra ulluinnarni Ilinniarfissuarmi ilinniartuuvoq, ukiut pingajussaanut killilluni.

Petra 2021-mi aatsaat sorlammut siulersuisunut ilannguppoq, siornatigulli 2017-miilli sorlammut angalaqataasarluni.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

“Angorusuppara meeqqat inuusuttullu tusarneqartutut misiginissaat. Arlaannik oqaasissaqarunik isumartik malillugu isummersorsinnaanissaat, tamannalu sumiiffinni assingiinngittuni meeqqanik inuusuttunillu suliniuteqartut peqatigalugit sulissutinginissaat.

Tamanna sorlammi ilaasortat aammalu siulersuisooqatigiilluta ataatsimoornitsigut suliniutit meeqqat inuusuttullu pillugit suleqatigiilluta angusinnaavarput” Petra oqarpoq

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Petrap kaammattuutigaa Sorlaap aaqqissuussanut peqataalluni misiliinissaq.

“Sorlaap aaqqissuussaanut arlaannut peqataagitsi.

Sammisat assingiinngitsut pitillugit inuttut pissarsiaqarnartarpoq aammalu takusinnaasarlugu peqataasut allat pissarsiaqartut. Sakkussatsinnimmi tuniorarneqartarpugut inuttut aammalu qanoq sullissisinnaanerluta” Petra oqarpoq.

Petrap inuusuttut imatut oqarfigerusuppai:

“Anguniangaqaruit sukataarutinguk aqqutaani aporfeeqqanik naapitsisarumaarputit kisiannili perusutat perusukkukku sukataarutiinnaruk”.

Ulluinnarni Aqutsisoq

Nadia Olsen

𝗡𝗮𝗱𝗶𝗮 𝗸𝗶𝗻𝗮𝗮𝘃𝗮?

Nadia Olsen 28-nik ukioqarpoq Iluliarmiuuvoq.

Nadia ulluinnarni Ilimmarfimmi ilinniartuuvoq, inuiaqatigiilerinermi ilisimatusarluni.

Nadia Sorlammi siulersuisunut ilaasortanngoqqammerpoq, siornatigulli Sorlaap aaqqissuussaanut peqataanikuulluni.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗿𝗮?

Nadia isumaqarpoq Sorlak social media aqqutigalugu ersarinnerulertariaqartoq.

“Angorusuppara Sorlak angalatitsilluni sammisassaqartitsinerata saniatigut, sociale medie aqqutigalugit ulluinnarni pisoqartitsinerunissaa” Nadia oqarpoq.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Nadiap kaammattuutigaa misilinnikuunngisamik misiliisarnissaq. Aammalu kammagiinneq ikioqatigiinnerlu eqqaamaneqartassasut.

“Meerannguit inuusuttullu, inuunitsinni qanorluunnit misigisaqaraluarutta nuannaarneq, kammagiinneq ikioqatigiinnerlu toqqartaraanni inuuneq nuannersorpassuarnik misigisassaqarfiuvoq.

Misilinnikuunngisasi misilittarsigit, misigisassarsiorneq nutaanillu takusassarsiorneq nuannersuupput 🤩 soormimi ilaannikkut iluatsitsivallaanngikkaluaraanni - ajunngilaq. 💫

Piginnaaneqartutit pikkorissuusutillu upperivakkit🤩

-Sorlammi takuss!” Nadia oqarpoq.

Siulersuisunut Ilaasortaq

Paninnguaq Kristensen

𝗣𝗮𝗻𝗶𝗻𝗻𝗴𝘂𝗮𝗾 𝗸𝗶𝗻𝗮𝗮𝘃𝗮?

Paninnguaq Kristensen 30-inik ukiulik, Iluliarmiuuvoq.

Paninnguaq ulluinnarni ilisimatusarfimmi ilinniartuuvoq, inuussutissarsiornermi aningaasaqarnermik ilisimatusarneq ingerlallugu.

Paninnguaq ukiorpassuarni Sorlammi suleqataavoq.

Paninnguaq ukioq 2012-imi Sorlammi siulersuisunut ilaasortanngoqqaarpoq, ukioq 2012-imiit siulersuisut ilaasortaasarpoq ukioq qinigaaffiusoq ataaseq pinnagu.

𝗦𝗼𝗿𝗹𝗮𝗺𝗺𝗶 𝘀𝘂𝗻𝗮 𝗮𝗻𝗴𝗼𝗿𝘂𝘀𝘂𝗽𝗽𝗮𝗮?

Paninnguup imminut toquttarnerup pinaveersaartinneqartuarnissaa pingaartitaraa.

“Kalaallit nunatsinni imminut toquttarnerup aammalu imminut toqunnissamik eqqarsaateqartarnerup kisitsisitigut qaffasippallaarput. Ikioqatigiinnikkut qaammarsaanikkullu pinaversaartitseqataajuaannarsinnaavugut.” Paninnguaq oqarpoq.

Paninnguup meeqqat inuusuttullu Sorlaap aaqqissuussanut peqataasut inuttut pissarsisarnissaat, ineriartornissaallu angorusuppaa. Aammalu peqataasut isumaat oqariartuutaallu tusaaneqartarnissaat pingaartittarlugu.

“Suliniutit sorlammiit ingerlanneqartartut inuttut ineriartorfiusarput, meeqqanut inuusuttunullu nalimmassarlugit pilersaarusiorneqartarlutik. Peqataaffigalugit pissarsinartuaannarput, periarfissallu atorluaqqunarput. Peqataanikkut isummat oqariartuutillu tusarneqarnissaat periarfissaasarpoq.”

Paninnguaq erseqqissaavoq.

𝗠𝗲𝗲𝗾𝗾𝗮𝗻𝘂𝘁 𝗶𝗻𝘂𝘂𝘀𝘂𝘁𝘁𝘂𝗻𝘂𝗹𝗹𝘂 𝗼𝗾𝗮𝗿𝗶𝗮𝗿𝘁𝘂𝘂𝘁𝗮𝗶:

Paninnguaq meeqqat inuusuttullu qaammarsaavigineqartuarnissaat pisinnaatitaaffinnillu ilisimaarinninnissaat pingaaruteqartuusoq isumaqarpoq.

“Sorlaap aaqqissuussaani peqataanikkut ilisimasassanik katersisoqarsinnaavoq.

Kammattuutigerusuppara peqataalluartoqartuaannarnissaa, misigisassanik puigunaatsunik pissarsiaqarnartarmat.

Kammalaatitaartornerit, illoqarfiit ilaanni tikinnikuunngisat tikinneqarsinnaaneri, peqataasullu ilisimasanik avitseqatigiinnerit suliniutissanillu isumataartoqatigiinnerit pisinnaasarlutik. Nuannersunik unamminarsinnaasunillu pissarsiaqarnartarpoq, peqataanissassinnillu innersuuppassi.

Periarfissasi atorluarsigit, pisinnaatillusilu misigisassarsiorlusi nuannersoqartuaannarpoq.” Paninnguaq oqarpoq.